ՀՀ առողջապահության նախարար Հարություն Քուշկյանն ընդունել է Հայաստանի Հանրապետությունը Մալարիայից ազատ գոտու կարգավիճակի վկայագրման գնահատման երկրորդ առաքելությունն իրականացնող ԱՀԿ կենտրոնական գրասենյակի պատվիրակությանը` ԱՀԿ մալարիայի հարցերով փորձագիտական հանձնախմբի նախագահող Վալտեր Վերնսդորֆերին, Աաֆյե Ռիետվելդին և Ռոստիցա Մինչևային:Ինչպես տեղեկացնում է ՀՀ առողջապահության նախարարության մամուլի ծառայությունը, Վալտեր Վերնսդորֆերը նշել է, որ վկայագրման նախապատրաստման աշխատանքային խմբի ուղեկցությամբ այցելել են Արարատի, Արմավիրի, Շիրակի մարզեր, գնահատել երկրում մալարիայի վերացման գործում ձեռքբերված առաջընթացը և երկրի պատրաստվածությունը մալարիայի կրկին արմատավորման կանխարգելմանը: Աաֆյե Ռիետվելդը նշել է, որ կատարվել է ծանրակշիռ և հետևողական աշխատանք, որի շնորհիվ էլ երկիրը շուտով կվկայագրվի որպես մալարիայից ազատ տարածք: Նշենք, որ մալարիան ուղեկցել է հայ ժողովրդին պատմության ողջ ընթացքում` բացառությամբ 1963-1994թթ.: 1994 թվականից ի վեր, 31 տարվա ընդմիջումից հետո, մալարիան կրկին արմատավորվեց Հայաստանի Հանրապետությունում և սկսեցին արձանագրվել մալարիայի տեղական դեպքեր: Հայաստանը մեծ քաղաքական նախաձեռնություն ցուցաբերեց, ծավալվեց համակարգված և բազմոլորտ պայքար մալարիայի դեմ: Այս գործում երկրին զգալիորեն աջակցեցին միջազգային կազմակերպությունները, մասնավորապես` Առողջապահության համաշխարհային կազմակերպությունը: Իրականացված համալիր աշխատանքի արդյունքում հաջողվեց կանխել հիվանդության հետագա տարածումը և Հայաստանում ստեղծվեցին մալարիայի վերացման նախադրյալներ: 2006թ. սկսած Հայաստանի Հանրապետությունում մալարիայի տեղական ծագման դեպք չի արձանագրվել: Ուստի, 2009թ. ՀՀ առողջապահության նախարարը դիմել է ԱՀԿ գլխավոր տնօրենին` Հայաստանը մալարիայից ազատ տարածք վկայագրելու համար: Վկայագրման գործընթացը նախատեսվում է ավարտել 2011-ին:
|