Ըստ Առողջապահության նախարար Հարություն Քուշկյանի` 2012 թվականի բյուջեով մանկաբարձական բուժօգնությանը հատկացվող գումարները նվազել են, քանի որ, ցավոք, ծնունդների թիվն է պակասել: Այսօր ԱԺ-ում շարունակվող գալիք տարվա պետական բյուջեի քննարկման շրջանակում Առողջապահության նախարարը տեղեկացրեց նաև, որ 2012թ.-ի բյուջեով մի փոքր գումար ավելի շատ է հատկացվելու զորակոչային տարիքի համար: «Սա նրա համար է, որ մարզերում կարողանանք հետազոտություններ անցկացնել»,- ասաց նա: Ինչ վերաբերում է ԱԺ պատգամավոր Անահիտ Բախշյանի հարցին, թե ինչ պետք է լինի Ամրավիրի մարզի Մեծամոր համայնքի բնակիչների ճակատագիրը, ովքեր երկու կիլոմետր պետք է քայլեն` առանց այն էլ վատ վիճակում գտնվող հիվանդանոց հասնելու համար, նախարարը պատասխանեց, որ կաշխատեն վերականգնել ու բարեկարգել հին հիվանդանոցը, որ երկու կիլոմետր քայլելու առիթ չլինի: Նա խոստացավ նաև արձագանքել մեծամորցիների`պատգամավորի միջոցով փոխանցած խնդրանքին ու այցելել նրանց:
|